La 28-an de aprilo — 1-an de majo en Uljánovsk danke al gastema loka klubo okazis tradicia renkontiĝo de volgiaj esperantistoj — VER-19. Entute partoprenis 20 homoj, el ili 9 aliurbanoj, kaj 2 homoj aliĝis al diskutoj rete. Jen impresoj de unu el partoprenintoj — Daniel:

«VER-19 estis bone organizita kaj neenua aranĝo. Ni havis bazejon, kie ni povis ion diskuti, spekti filmojn kaj prezentaĵojn, ludi kaj ankaŭ trinki teon kaj manĝeti. Ni havis ankaŭ loĝejon, kie ni povis dormi en pli-malpli komfortaj kondiĉoj kaj kuiri por ni mem. Krom paroliga kurso, konkurso de interpretistoj kaj aliaj nepraj aĵoj de ĉiu Esperanto-aranĝo tie ĉi estis iu tre grava, kiu diferencigis VER-19 de ĉiuj aranĝoj, en kiuj mi estis (mi estis nur en APERO en Moskvo kaj en RET en Kazanj). La organizantoj decidis diskuti pri Esperanto-movado kaj kion ni povas fari por Esperanto-movado tuj en la komenco de la aranĝo. Ni diskutis kaj laboris dum la tuta periodo de la aranĝo, kaj mi esperas, ke tiu laboro estis fruktodona.

Krome estis multe da esperantistoj-komencantoj, do ni parolis en Esperanto kun tuja traduko en la rusan. Okazis eta virtuala kunveno, iomete kaosa laŭ mi, malbone organizita. Krome, pasis multaj interesaj ekskursoj tra la urbo kun riĉa historio, belega arkitekturo kaj ĉarmaj parkoj. La tempo por organizi VER estis brile elektita, ĉar ĉe la 1-a de majo la urbo plej plaĉas.»