Karaj rusiaj esperantistoj!

Por la Nova jaro la Estraro volus stimuli Esperanto-agadon de individuoj kaj kluboj kaj tiucele lanĉas konkurson de projektoj por Esperanto en Rusio.

Se vi havas iun ideon pri tio, kiel progresigi Esperanton en nia lando, kiel reklami ĝin, evoluigi, engaĝi novajn homojn kaj aktivigi spertajn esperantistojn — tiam vi povas proponi vian projekton por la konkurso kaj gajni financan subtenon. La projekto povas esti, ekzemple, iu ekspozicio, fulmo-kurso de Esperanto, eble io alia, kion vi elpensos.

Kondiĉoj estas jenaj:

• Projekto devas esti konforma al statutaj celoj, taskoj kaj rajtoj de REU. Ja se ĝi ne konformas, ni ne rajtas ĝin financi. Vidu la koncernan eltiraĵon el la Statuto sube.
• Limdato por sendi proponojn: la 31-a de januaro.
• Projekto enhavu priskribon de tio, kion vi intencas fari, kiujn rezultojn atingi, kaj argumentadon — kiamaniere tio progresigos Esperanton en Rusio.
• Indiku daŭron de via projekto. Ĉu estas iniciato por unu tago aŭ longdaŭra aktivaĵo por semajnoj aŭ monatoj?
• Projekto enhavu financan planon, almenaŭ proksimuman — por kio kaj kiom da mono vi bezonos.
• Subvencion por projekto povas ricevi individua membro de REU aŭ aliĝinta klubo.
• Maksimuma sumo de subvencio de REU por unu projekto estas 10 mil rubloj. Se necesas elspezoj super tio, ili estu el via propra mono.
• Projekto estu efektivigita dum la unua duonjaro 2023, do ĝis la 30-a de junio.
• Post efektivigo de la projekto vi devos liveri al ni raportojn pri ĝi, tio estas minimume 1) artikolo por «Ponto», kie vi rakontu pri via laboro kaj rezultoj, dezirinde kun fotoj; 2) financa raporto por la kaso pri la uzita mono (ĉiujn fakturojn konservu, eble ni petos ilin, ĉu elektronike, ĉu papere).

Komence de februaro la Estraro pripensos la venintajn proponojn kaj decidos, kiu(j)n el ili subvencii, se tiaj estos, aŭ konstatos, ke taŭgaj proponoj ne venis.

Speciale bonvenaj estas proponoj el neĉefurbaj regionoj, ja ni celas progresigi nian lingvon en la tuta lando.

Proponojn sendu al reu-estraro@groups.io

Suplemento. Eltiraĵo el la Statuto de REU

1.2. Celoj de REU estas:

• popularigo kaj disvastigo de la lingvo Esperanto;
• plifirmigo de la paco, evoluigo de la internacia kunlaboro en ĉiuj sferoj de la homa agado helpe de la lingvo Esperanto.

1.3. Konforme al la celoj REU starigas antaŭ si jenajn taskojn:

• organizado de informinterŝanĝoj pri instruado, disvastigo kaj praktika uzado de la lingvo Esperanto;
• trejnado kaj atestado de instruistoj de Esperanto;
• organizado de esperantistaj aranĝoj, inkluzive internaciajn (renkontiĝoj, seminarioj ks);
• kunordigo de planoj de amasaj aranĝoj, praktika, metodika kaj materiala helpo al ties organizantoj;
• organizado de servoj, garantiantaj kontentigon de la informaj, sciencaj, komunikaj, klerigaj interesoj kaj bezonoj de esperantistoj, speciale, pri ricevo de literaturo, de korespondaj adresoj, pri plialtigo de kvalifiko ks;
• eldonado de periodaĵoj kaj literaturo laŭ sia temaro en Esperanto kaj aliaj lingvoj konforme al la leĝaro pri gazetaro kaj aliaj amasinformiloj;
• kunlaboro kun ajnaj, inkluzive internaciajn, organizaĵoj pri demandoj de reciproka intereso;
• reprezentado de la interesoj de REU-membroj en internaciaj kaj landaj esperantistaj organizaĵoj, en ŝtataj kaj sociaj organizaĵoj.

1.4. Por efektivigi la statutajn celojn REU rajtas:

• libere disvastigi informojn pri sia agado;
• partopreni en ellaboro de decidoj de ŝtatpotencaj kaj municipaj organoj laŭ ordo kaj en amplekso, antaŭviditaj de la leĝaro;
• okazigi kunvenojn, mitingojn, demonstraciojn, manifestaciojn kaj pikedojn;
• fondi amasinformilojn kaj efektivigi eldonan agadon;
• reprezenti kaj defendi siajn rajtojn, justajn interesojn de siaj membroj kaj aliaj civitanoj en ŝtatpotencaj kaj municipaj organoj kaj sociaj unuiĝoj;
• efektivigi en plena amplekso la funkciojn, antaŭviditajn de la leĝoj pri sociaj unuiĝoj;
• pledi kun iniciatoj pri diversaj demandoj de la socia vivo, prezenti proponojn al ŝtatpotencaj organoj.