Kun espero je rekomenco de «vivaj», nevirtualaj kunvenoj rusiaj esperantistoj eniras novan agadsezonon..

La 9-an de septembro okazis renkontiĝo de la peterburga Esperanto-klubo «Kariljono». La kunveno pasis en la biblioteko №1 de la Apudmara distrikto de Sankt-Peterburgo (str. Torĵkovskaja, d. 11).

Enkadre de la kunveno:

• Anatolo Sidorov prelegis pri Aleksandr Nevskij;
• la partoprenantoj interŝanĝis somerajn impresojn;
• Jekaterina Maliŝeva rakontis pri tri numeroj de la amatora ĵurnalo «Espero»; la ĉeestantoj interŝanĝis pensojn pri tio, kiujn materialojn ili volus vidi en la ĵurnalo; levis demandon pri pli interesa kaj nestandarta titolo por la ĵurnalo.

La sekva kunveno de peterburganoj estas planata por la 16-a de septembro.

Intercetere, en Moskvo oni preskaŭ interkonsentis pri loko por klubkunvenoj de la moskva Esperanto-klubo «Lev Tolstoj». Do, estas espero pri baldaŭa malvirtualiĝo ankaŭ por la moskva esperantistaro.